మెగా హీరో స్వారీ చేస్తే విక్టరీ గ్యారంటీ

గుర్రం పైన స్వారీ చేయడం .. అదో కళ. అందంగా స్వారీ చేయడం.. మెగాస్టార్ ఫ్యామిలీకి మాత్రమే తెలిసిన విద్య. మేలుజాతి గుర్రాలను మెరుగ్గా నడిపించగల నేర్పు వీరి సొంతం. పోరాట సన్నివేశాల్లో అశ్వాలపై వేగంగా స్వారీ చేస్తూ.. విజయ తీరాలను చేరుకున్నారు. ఈ హీరోల చేతిలో రాకెట్లా దూసుకెళ్లే ఈ గుర్రాలను చూస్తుంటే.. వీరి జోడిని బ్రహ్మ స్వర్గంలోనే రాసి పెట్టాడా ? అనిపిస్తుంటుంది.

చిరంజీవి

కొండవీటి దొంగ(1990) లో ముసుగు దొంగగా గుర్రం పైన మెగాస్టార్ చిరంజీవి నటించిన తీరుకు తెలుగు సినీ ప్రేక్షకులు జేజేలు పలికారు. గుర్రం పైనే ఫైట్, పాట చేసి ఔరా అనిపించారు. సూపర్ హిట్ అందుకున్నారు. అదే ఏడాది విడుదలయిన కొదమ సింహం లోనూ అచ్చమైన కౌ బాయ్ గా గుర్రం పై స్వారీ చేసి మెగాస్టార్ అనిపించుకున్నారు. మళ్లీ పాతికేళ్ల తర్వాత కూడా చిరు బ్రూస్లీ సినిమాలో తన స్టయిల్లో హార్స్ రైడింగ్ చూపించారు.

మగధీర

మెగా పవర్ స్టార్ రామ్ చరణ్ తేజ్ ను కాల భైరవగా పరిచయం చేసిన చిత్రం మగధీర. రెండో చిత్రంలోనే చెర్రీ హార్స్ రైడింగ్ చేసి అలరించారు. ఈ చిత్రంలో అశ్వంతో కలిసి కాల భైరవ చేసిన పోరాటాలు, సాహసాలు ప్రత్యేక ఆకర్షణగా నిలిచాయి. హర్ష పాత్రలో కూడా రామ్ చరణ్ గుర్రాన్ని నేటి సిటీ రోడ్లపై చాకచక్యంగా నడిపి శెభాష్ అనిపించుకున్నారు. మెగాస్టార్ కి తగ్గ తనయుడిగా నిరూపించుకున్నారు.

పవన్ కళ్యాణ్

పవర్ స్టార్ పవన్ కళ్యాణ్ తన సినిమాల్లో బైక్, కార్లకే ఎక్కువగా ప్రాధాన్యత ఇస్తారు. ఆయన తొలిసారి పూర్తి స్థాయిలో గుర్రంస్వారీ చేసిన సినిమా గబ్బర్ సింగ్. ఇందులో హీరో ఇంటర్డక్షన్ హార్స్ పైనే ఉంటుంది. హార్స్ కి పవర్ తోడయ్యేసరికి ఆ చిత్రం బంపర్ హిట్ గా నిలిచింది. అదే సెంటిమెంట్ తో పవన్ సర్దార్ గబ్బర్ సింగ్ లోనూ గుర్రంతో కలిసి తెరపైన తమాషా చేశారు.

అల్లు అర్జున్

స్టయిలిష్ స్టార్ అల్లు అర్జున్ గుర్రం పై ఎక్కి స్వారీ చేయగానే అవార్డులు పరిగెత్తుకు వచ్చాయి. దీంతో మెగా ఫ్యామిలీకి అశ్వం కలిసి వచ్చే కాంబినేషన్ గా మరోసారి నిరూపణ అయింది. రుద్రమదేవి చిత్రం లో గోన గన్నా రెడ్డి పాత్రలో బన్నీ గుర్రం పై వస్తుంటే చప్పట్ల వర్షం కురిసింది. అశ్వం పై హుందాగా కూర్చొని డైలాగులు చెబుతుంటే అభిమానులకు కనుల పండువగా అనిపించింది. ఈ సినిమాలో ప్రత్యేక పాత్రలో నటించినా ఉత్తమ నటుడిగా అల్లు అర్జున్ అవార్డు అందుకున్నారు.

సాయి ధరమ్ తేజ్

మెగా ఫ్యామిలీ నుంచి వచ్చిన మరో హీరో సాయి ధరమ్ తేజ్. మామయ్యలు చిరంజీవి, పవన్ కళ్యాణ్ ల పోలికలతో కనిపిస్తూ.. ఉత్సాహంగా నటిస్తూ దూసుకుపోతున్నాడు. సుబ్రమణ్యం ఫర్ సేల్, సుప్రీం సినిమాలతో హిట్ ట్రాక్ లోకి వచ్చేసాడు. ప్రస్తుతం తిక్క షూటింగ్ కంప్లీట్ చేసాడు. ఆ చిత్రం పోస్టర్ రిలీజ్ అయింది. ఇందులో సాయి ధరమ్ తేజ్ తెల్ల గుర్రంపై ఉన్న స్టిల్ సినిమాపై అంచనాలను పెంచింది. మెగా హీరోలకు కలిసి వచ్చిన హార్స్ సెంటిమెంట్ ఇతనికి కూడా వర్కౌట్ అవుతుందని సినీ పండితులు చెబుతున్నారు.