Hari Hara Veera Mallu: పవన్ సినిమాకే ఎందుకిలా.. మరి వర్కౌట్ అవుతుందా..!

పెద్ద సినిమాల విడుదల సమయంలో పెట్టిన పెట్టుబడి వెనక్కి రావాలంటే ఫస్ట్ ఓపెనింగ్స్ కీలకపాత్ర పోషిస్తుంది. ఓపెనింగ్స్‌ను బట్టే సినిమా మొత్తం కలెక్షన్స్ ఆధారపడి ఉంటుంది. గత కొంతకాలంగా ప్రతి పెద్ద సినిమా విడుదలకు రెండు తెలుగు రాష్ట్రాల ప్రభుత్వాలను నిర్మాతలు కలిసి టికెట్ రేట్ పెంపు, స్పెషల్ షో అనుమతులను దక్కించుకుని లబ్ధి పొందుతున్నారు. చిత్రసీమను ప్రోత్సహించే ఉద్దేశంతో ప్రభుత్వాలు కూడా నిర్మాతలు ఏం అడిగితే అది కాదనకుండా చేస్తున్నాయి.

Hari Hara Veera Mallu

అయితే పుష్ప 2 (Pushpa 2) రిలీజ్ సందర్భంగా హైదరాబాద్ సంధ్య థియేటర్ వద్ద తొక్కిసలాట చోటు చేసుకోవడంతో తెలంగాణ ముఖ్యమంత్రి రేవంత్ రెడ్డి సినీ పరిశ్రమపై సీరియస్ అయ్యారు. తాను సీఎంగా పదవిలో ఉన్నంత వరకు టికెట్ రేట్ల పెంపు, స్పెషల్, బెనిఫిట్ షోలకు అనుమతులు ఉండవని తేల్చిచెప్పారు. తెలుగు సినిమాకు మేజర్ ఆదాయ వనరుగా ఉన్న నైజాం ఏరియాలో ఈ పరిస్థితి పరిశ్రమకు తీవ్ర నష్టం కలిగించింది. సంక్రాంతి సినిమాలపై దీని ప్రభావం గట్టిగా పడింది.

రేవంత్ రెడ్డిని ప్రసన్నం చేసుకునేందుకు దిల్‌రాజ్ (Dil Raju) ద్వారా పెద్ద తలకాయలు పావులు కదుపుతున్నాయి. కానీ ఏపీ ప్రభుత్వం మాత్రం సినీ ప్రముఖుల ముందు ఎలాంటి షరతులు పెట్టకుండా ఏం కావాలంటే అది చేసి పెడుతోంది. అయితే ఇటీవల థియేటర్‌ల బంద్ ఇష్యూతో డిప్యూటీ సీఎం పవన్ కళ్యాణ్  (Pawan Kalyan) తీవ్ర ఆగ్రహం వ్యక్తం చేశారు. తెలుగు చిత్ర పరిశ్రమ తనకు రిటర్న్ గిఫ్ట్ ఇచ్చిందని ఆవేదన వ్యక్తం చేశారు.

ఇకపై టికెట్ రేట్ల పెంపు సహా పరిశ్రమకు చెందిన ఈ విషయంపై చర్చించాలన్నా వ్యక్తిగతంగా రావొద్దని, ఫిలిం ఛాంబర్ ద్వారానే సంప్రదించాలని హుకుం జారీ చేశారు. పవన్ నిర్ణయంతో పెద్ద నిర్మాతలు ఇబ్బందుల్లో పడ్డారు.అయితే జూన్ 12న విడుదల కానున్న ‘హరిహర వీరమల్లు’కు  (Hari Hara Veera Mallu)  టికెట్ రేట్ల పెంపు, స్పెషల్ షోలు ఉంటాయా? లేదా? అన్న అనుమానాలు వ్యక్తమవుతున్నాయి. తెలంగాణ సీఎం రేవంత్ రెడ్డిని ఇప్పటికే నిర్మాత ఏ ఎం రత్నం (AM Rathnam)  కలిసి టికెట్ రేట్ల పెంపుపై అభ్యర్ధించారు.

దీనిపై రేవంత్ సానుకూలంగా స్పందించడంతో పవన్ సినిమాకు తెలంగాణలో లైన్ క్లియర్ అయినట్లే, నేడో రేపో వీరమల్లు టికెట్ రేట్ పెంపుపై ఉత్తర్వులు వచ్చే అవకాశం ఉందని ఫిలింనగర్ టాక్. ఇక ఏపీ విషయానికి వస్తే.. తను పెట్టిన నిబంధనను తానే అతిక్రమించ కూడదన్న పట్టుదలతో ఉన్నారు పవన్ కళ్యాణ్. అందుకే ఏఎం రత్నాన్ని ఫిలిం ఛాంబర్ ద్వారానే తనను కలవమని ఇప్పటికే సూచించారు.

పవన్ చెప్పినట్లు గానే ఏఎం రత్నం నడుచుకుని టికెట్ రేట్ పెంపును సాధించడం లాంఛనమేనని సినీ వర్గాలు గుసగుసలాడుకుంటున్నాయి. హరిహర వీరమల్లు (Hari Hara Veera Mallu) టికెట్ రేట్ల పెంపు, స్పెషల్ షోలపై త్వరలోనే ఏపీ, తెలంగాణ ప్రభుత్వాలు కీలక ప్రకటన విడుదల చేసే అవకాశం ఉంది.

సినీ పరిశ్రమలో విషాదం.. అనారోగ్యంతో నటి కన్నుమూత!