బుల్లితెర కామెడీ షోల్లో ‘జబర్దస్త్’కి ఉన్న క్రేజ్ అంతా ఇంతా కాదు. చెప్పాలంటే ఈ షో వచ్చిన తరువాత కామెడీ కోసం థియేటర్ల వరకూ వెళ్ళి సినిమా చూడాలా… ‘జబర్దస్త్’ చూస్తే సరిపోతుంది కదా’ అంటూ కామెడీ సినిమాల్ని జనాలు తిరస్కరిస్తున్నారు. అంతగా పాపులర్ అయ్యింది ఈ షో. ఈ షో లో ఆర్టిస్టులతో పాటూ జడ్జిలు కూడా అంతే ఫేమస్. అయితే ఈ షోకి జడ్జిలుగా వ్యవహరించే నాగబాబు, రోజా లు ప్రస్తుతం రాజకీయాల కారణంగా ఈ షోకి బ్రేక్ ఇచ్చారు. దీంతో షో నిర్వాహకులు.. ఓ జడ్జి కోసం సీనియర్ నటి జయసుధని సంప్రదించారట. కానీ ఆ ఆఫర్ ని ఆమె తిరస్కరించిందని తాజా సమాచారం.
పలు ఫ్యామిలీ చిత్రాల్లో నటిస్తూ క్లాస్ ఇమేజ్ ని సొంతం చేసుకున్న జయసుధ క్యారెక్టర్ ఆర్టిస్ట్ గా మారిన తరువాత కూడా కుటుంబ విలువలు ఉన్న పాత్రల్లో నటిస్తూ ముందుకు సాగుతున్నారు. ఈ క్రమంలో ఇలాంటి వల్గర్ కామెడీ షో తనకు సూటవ్వదని జయసుధ సున్నితంగా తనకు వచ్చిన ఆఫర్ ని తిరస్కరించారట. పెద్ద మొత్తంలో రెమ్యునరేషన్ ఆఫర్ చేసినా ఆమె నో చెప్పారట. జయసుధ నో చెప్పడంతో ఈ షోకి ఒకప్పటి హీరోయిన్ మీనాని రంగంలోకి దించారు. ప్రస్తుతం శేఖర్ మాస్టర్, మీనా కలిసి ఈ షోని హోస్ట్ చేస్తున్నారన్న మాట.
