ఐపీఎల్ 2018 కు రంగం సిద్ధమైపోయింది. ఈ సీజన్ (తెలుగు) కి ఎన్టీఆర్ బ్రాండ్ అంబాసిడర్ గా వ్యవహరిస్తున్న సంగతి తెలిసిందే. ఈరోజు ప్రారంభోత్సవ వేడుకతో ఐపీఎల్ పండుగ ప్రారంభం కానుంది. ఈ కార్యక్రమంలో బాలీవుడ్ తారల అందాలు, వారి నృత్య ప్రదర్శన ప్రధాన ఆకర్షణగా మారనున్నాయి. గత ఏడాది ఐపీఎల్ సీజన్ ప్రారంభోత్సవ వేడుకలో పరిణీతి చోప్రా, అమీ జాక్సన్ మరియు దిశా పటాని పెర్ఫామెన్స్ తో ఆకట్టుకున్నారు. ఈ ఐపీఎల్ ప్రారంభోత్సవ వేడుకలో మిల్కీ బ్యూటీ తమన్న తన స్టెప్పులతో అదరగొట్టనుంది. ఇందుకోసం తమన్నా భారీ పారితోషికం అందుకోనున్నట్లు టాక్. పది నిముషాల నృత్య ప్రదర్శనకు అరకోటి రూపాయలను తీసుకోబోతున్నట్టు సమాచారం. ఇది ఒక సినిమా లో స్పెషల్ సాంగ్ చేయడానికి తీసుకునే రెమ్యునరేషన్ తో సమానం.
జై లవకుశలో “స్వింగ్ జరా” పాటకు ఇంతే మొత్తంలో రెమ్యునరేషన్ అందుకున్నట్టు ఫిలిం నగరవాసులు చెప్పారు. అక్కడ ఐదు రోజుల పాటు కష్టపడితే ఇక్కడ కొన్ని గంటలు కష్టపడితే సరిపోతుంది. నేటి కథానాయికల్లో అద్భుతంగా డ్యాన్స్ వేయగలదనే కారణంతోనే ఈ అవకాశం తమన్నాకి వరించింది. తమన్నాతో పాటు ఈ కార్యక్రమంలో బాలీవుడ్ స్టార్ హీరో రణ్ వీర్ సింగ్ కూడా పాల్గొనాలి. కానీ అతనికి చేతికి గాయం కావడంతో ప్రదర్శన చేయడం లేదని తెలిసింది. ఇంకా పరిణీతి చోప్రా, హృతిక్ రోషన్ లు డ్యాన్స్ వేయనున్నట్లు బాలీవుడ్ వర్గాలు తెలిపాయి. వీరికి కోట్లలో రెమ్యునరేషన్ అందిస్తున్నట్టు సమాచారం.
