మంచు కుటుంబంలో గత కొన్ని రోజులుగా చర్చనీయాంశమైన కుటుంబ విభేదాలు మంగళవారం మరింత తీవ్రమయ్యాయి. ఈ సందర్భంలో మంచు విష్ణు (Manchu Vishnu) మీడియాతో మాట్లాడారు. ఆయన తన తండ్రి మంచు మోహన్ బాబు (Mohan Babu), తల్లి, తమ్ముడు మనోజ్ (Manchu Manoj) ఆరోగ్య పరిస్థితుల గురించి వెల్లడించారు. ఇది తమ కుటుంబాన్ని ఎంతగానో బాధిస్తోందని, త్వరలోనే సమస్యలు పరిష్కారమవుతాయని నమ్ముతున్నట్లు తెలిపారు. తన తండ్రి తీసుకున్న నిర్ణయాలను గౌరవించడం తాము అందరి బాధ్యత అని, కుటుంబ పెద్దగా మోహన్ బాబుకు న్యాయంగా మాట్లాడే హక్కు ఉందని విష్ణు అన్నారు.
‘‘మమ్మల్ని విపరీతంగా ప్రేమించడమే నాన్న చేసిన తప్పు. ఇది కుటుంబ అంతర్గత విషయం. దయచేసి దీనిని సెన్సేషనల్ చేయొద్దని మీడియాను కోరుతున్నాను’’ అని చెప్పుకొచ్చారు. మనోజ్ ప్రవర్తనపై వచ్చిన విమర్శలకు స్పందిస్తూ ‘‘యాక్షన్ స్పీక్స్ మోర్ దెన్ వర్డ్స్’’ అంటూ ఒక వివరణ ఇచ్చారు. నిన్న జరిగిన ఘర్షణలో నాన్న గారికి స్వల్ప గాయాలు అయ్యాయని , అమ్మ కూడా ఆసుపత్రిలో చేరారని విష్ణు తెలిపారు. ‘‘ఇటువంటి సంఘటనలు ఏ కుటుంబానికైనా బాధ కలిగిస్తాయి.
కానీ మేము త్వరలోనే అన్ని సమస్యలను పరిష్కరించుకుంటాం. నా తమ్ముడితో, తల్లిదండ్రులతో మాట్లాడి సమస్యను చర్చిస్తాను’’ అని వివరించారు. ఈ గొడవకు ఆస్తి కారణమా లేక ఇతర విషయం కారణమా అనే ప్రశ్నకు స్పందిస్తూ.. అది మనోజ్ వివాహం గురించి కాదని స్పష్టంగా చెప్పగలను. మిగిలిన వివరాలు ఇప్పుడు చెప్పడం సరైనది కాదు.. అని తెలిపారు. నిన్న జరిగిన సంఘటనలో ఒక విలేకరి గాయపడటాన్ని విచారిస్తూ, అది మా ఉద్దేశ్యపూర్వక చర్య కాదు.
నేను వ్యక్తిగతంగా బాధిత కుటుంబంతో మాట్లాడాను. అవసరమైన సాయం అందిస్తామని వారికి హామీ ఇచ్చాను.. అని విష్ణు వివరించారు. తన కుటుంబం గురించి మున్ముందు ఎక్కువగా మాట్లాడేందుకు ఇష్టపడనని, సమస్యలను కుటుంబం ఆంతర్యంగానే పరిష్కరించుకుంటామని అన్నారు. ‘‘నాలుగు రోజుల క్రితం లాస్ ఏంజిల్స్లో ఉన్నప్పుడు ఈ సమస్యపై ఫోన్ ద్వారా తెలిసింది. వెంటనే ప్రయాణాన్ని రద్దు చేసి ఇక్కడికి చేరుకున్నాను. నా కుటుంబం నా జీవితంలో అత్యంత ముఖ్యమైనది’’ అని చెప్పిన విష్ణు, మీడియా మరింత బాధ్యతతో వ్యవహరించాలని కోరారు.
