వచ్చే ఆరు నెలలు టాలీవుడ్‌ ఎలా ఉంటుందో తెలుసా?

June 29, 2022 / 03:34 PM ISTByFilmy Focus

Join Us

వచ్చే ఆరు నెలలు టాలీవుడ్‌ ఎలా ఉంటుందో తెలుసా?

2022 సగం పూర్తయిపోతోంది. ఇంకో రెండు రోజులు ఆగితే.. ఈ ఏడాదిలో సెకండాఫ్‌ మొదలవుతుంది. మనం సినిమా వాళ్లం కాబట్టి.. ఈ సెకండాఫ్‌లో వచ్చే కొత్త సినిమాలేంటి, వాటి సంగతేంటో చూద్దాం. ఇప్పటివరకు టాలీవుడ్‌కి ఈ ఏడాది మంచే చేసింది. పెద్ద పెద్ద సినిమాలు వచ్చి మంచి విజయాల్ని అందుకున్నాయి. మరి ద్వితీయార్ధంలో ఏయే సినిమాలొస్తాయి, వాటి పరిస్థితి ఏంటో చూద్దాం.

* జులైలో పేరున్న సినిమాలు ఎక్కువగానే వస్తున్నాయి. 1వ తేదీన గోపీచంద్‌ – మారుతి ‘పక్కా కమర్షియల్‌’ వస్తుంది. 14న రామ్‌ – లింగుస్వామి ‘వారియర్‌’ తీసుకొస్తున్నారు. నాగచైతన్య – విక్రమ్‌ కె కుమార్‌ ‘థ్యాంక్‌ యూ’, నిఖిల్‌ – చందు మొండేటి ‘కార్తికేయ 2’ 22న వస్తాయి. 29న రవితేజ ‘రామారావు ఆన్‌ డ్యూటీ’, అడివి శేష్‌ ‘హిట్‌ 2’ తీసుకొచ్చే ప్రయత్నాలు జరుగుతున్నాయి.

* ఆగస్టు సంగతి వచ్చేసరికి రెండో వారం మంచి బిజీగా మారబోతోంది. లాంగ్‌ వీకెండ్‌ కావడంతో కుర్ర హీరోల సినిమాలు వరుసకడుతున్నాయి. అఖిల్‌ – సురేందర్‌ రెడ్డి ‘ఏజెంట్‌’, నితిన్‌ ‘మాచర్ల నియోజకవర్గం’ సినిమాలు ఆగస్టు 12న తీసుకొస్తున్నారు. సమంత ‘యశోద’ కూడా అప్పుడే వస్తోంది. దుల్కర్‌ సల్మాన్‌ – హను రాఘవపూడి ‘సీతా రామం’ ఆగస్టు 5న తీసుకొస్తున్నారు. పూరి జగన్‌ – విజయ్‌ దేవరకొండ ‘లైగర్‌’ను ఆగస్టు 25న తీసుకొస్తారు.

* సెప్టెంబరులో రిలీజ్‌ అయ్యే సినిమాలు అంటే ఇప్పటివరకు అధికారికంగా ప్రకటించిన సినిమా అంటే రవితేజ ‘రావణాసుర’ ఒక్కటే. ఆగస్టులో విడుదల చేస్తారని గతంలో వార్తలొచ్చిన ‘బింబిసార’ను సెప్టెంబరులో తీసుకొస్తారని అంటున్నారు. ఇంకా నెలల ప్రకారం చూసుకుంటే విజయ్‌ దేవరకొండ – సమంత – శివ నిర్వాణ సినిమా ‘ఖుషి’ డిసెంబరు 23న తీసుకొస్తారు.

* ఇక డేట్స్‌ అధికారికంగా చెప్పని సినిమాలు చాలానే ఉన్నాయి. హీరోల వారీగా చూస్తే చిరంజీవి ‘లూసిఫర్‌’ దసరా కానుకగా తీసుకొస్తారని చెబుతున్నారు. ఇక బాలకృష్ణ – గోపీచంద్ మలినేని సినిమాను కూడా అదే సమయానికి అంటున్నారు. ఈ సినిమాల విడుదల తేదీలపై క్లారిటీ రావాల్సి ఉంది. వెంకటేశ్‌ నుండి ఇంకా ఏ సినిమా రెడీగా లేదు. నాగార్జున – ప్రవీణ్ సత్తారు సినిమా షూట్‌ అయ్యింది. ఆ తర్వాత ఎలాంటి ముచ్చట్లూ లేవు. కాబట్టి చెప్పలేం.

* పవన్‌ కల్యాణ్‌ నుండి ‘హరి హర వీరమల్లు’ సినిమా ఎప్పుడు అవుతుందో చెప్పలేం. అయితే ఈ ఏడాది ఆఖరులో వచ్చేయొచ్చు. మహేష్‌బాబు, ఎన్టీఆర్‌, రామ్‌చరణ్‌, తారక్‌, అల్లు అర్జున్‌, ప్రభాస్‌.. నుండి ఈ ఏడాది సినిమాలు ఆశించలేం. ఇంకా ఎవరి సినిమా కూడా విడుదలకు సిద్ధంగా లేవు. నాని నుండి అయితే ‘దసరా’ రిలీజ్‌ అవుతుంది అంటున్నారు. సమంత – గుణశేఖర్‌ల ‘శాకుంతలం’ సినిమా ఇంకా పోస్ట్‌ ప్రొడక్షన్‌లో ఉంది. విడుదల తేదీ మీద ఇంకా ఎలాంటి సమాచారం లేదు.