Bobby: 400 మంది కష్టాన్ని ఒక్క మాటతో చంపేస్తున్నారు… బాబీ ఆవేదన!

మొబైల్‌లో షార్ట్‌ వీడియోలు చూస్తున్నప్పుడు స్క్రోలింగ్‌.. సినిమా వాళ్లకు ట్రోలింగ్‌ కామన్‌ అయిపోయింది. రెండింటినీ ఆపలేని దుర్భర పరిస్థితిలోకి వచ్చేశాం. నచ్చింది అనేస్తాం, అనుకున్నది రాసేస్తాం అంటూ రెచ్చిపోతున్నారు నెటిజన్లు. దీనికి ఏదో ఒక హీరో ఫ్యాన్‌ అనే ముసుగేసుకుంటున్నారు. టాలీవుడ్‌లో ఇలాంటి కామెంట్ల వేడికి ఇబ్బందిపడని దర్శకుడు లేరు అంటే అతిశయోక్తి కాదు. అలాంటి వారిలో ఒకరైన దర్శకుడు కేఎస్‌ రవీంద్ర (బాబి)  (K. S. Ravindra) దగ్గర ఈ విషయం గురించి ప్రస్తావిస్తే ఆయన ఆసక్తికర సమాధానం ఇచ్చారు.

Bobby

ఈ రోజుల్లో ఎంత గొప్ప సినిమా వచ్చినా.. దాని గురించి సోషల్ మీడియాలో నెగెటివ్ ప్రచారం జరగడం మామూలైపోయింది. కొన్ని సినిమాలు ఇవన్నీ తట్టుకుని నిలబడుతున్నాయి. కొన్ని దెబ్బ తింటున్నాయి. టాలీవుడ్‌ మనుషుల విషయంలోనూ ఇదే జరుగుతోంది అని విశ్లేషించారు బాబీ. సోషల్ మీడియాలో నెగెటివ్ రివ్యూలు తొలి రోజుల్లో సరదాగా మొదలయ్యాయి. అయితే ఇప్పుడు ఇది మొత్తంగా పరిశ్రమనే ఇబ్బంది పెడుతోంది అని బాబీ అన్నారు.

సినిమా అంటే ఒక వ్యక్తి కాదని, కొన్ని వందల మంది కష్టమని చెప్పిన ఆయన.. తన సినిమా సెట్స్‌లోనే 400 మందికిపైగా పని చేస్తారని, ఇంతమంది శ్రమను ఒక్క మాటతో చంపేయడం తప్పు కదా అని ప్రశ్నించారు. అయినా ‘బాహుబలి’ (Baahubali) లాంటి గొప్ప సినిమా తీసిన రాజమౌళిని (S. S. Rajamouli) కూడా ట్రోల్ చేశారని, కానీ చివరికి ఆ సినిమా ప్రపంచవ్యాప్తంగా ప్రభంజనం సృష్టించిందని చెప్పారు బాబీ (Bobby).

అలాంటి వ్యక్తినే ట్రోల్ చేసినపుడు నేనెంత అని అనుకుంటూ ఉంటానని తన ఆలోచనా విధానం గురించి చెప్పుకొచ్చారు బాబీ. చిరంజీవితో తాను చేసిన ‘వాల్తేరు వీరయ్య’కు   (Waltair Veerayya)తక్కువ రేటింగ్స్ ఇచ్చారని, కానీ ఆ సినిమా బ్లాక్ బస్టర్ అయింని బాబీ గుర్తు చేశారు. ఇక బాబీ – బాలకృష్ణ (Nandamuri Balakrishna), కాంబినేషన్‌లో వచ్చిన ‘డాకు మహారాజ్‌’ (Daaku Maharaaj) సినిమా ఈ సంక్రాంతికి వచ్చి మంచి టాకే సంపాదించుకుంది. కానీ ‘సంక్రాంతికి వస్తున్నాం’(Sankranthiki Vasthunam)  సినిమా ప్రభంజనంలో ‘డాకు మహారాజ్‌’ సైలెంట్‌గా ఉండాల్సి వచ్చింది.