Vtv Ganesh: వెంకటేశ్‌ సినిమా ఈవెంట్‌.. విజయ్‌ సినిమా విషయంలో క్లారిటీ!

ఈ ఇన్నింగ్స్‌లో విజయ్‌ ఆఖరి సినిమా అని చెబుతున్న 69వ సినిమా గురించి గత కొన్ని రోజులుగా ఓ వార్త సోషల్‌ మీడియా హల్‌చల్‌ చేస్తోంది. నిజానికి అది కోడంబాక్కం వర్గాల నుండి వచ్చిన మాటే. అదే ఆ సినిమా ఓ తెలుగు సినిమాకు రీమేక్‌ అని. ఈ విషయం దర్శకుడు ఓ సారి క్లారిటీ ఇచ్చినా.. ఇప్పుడు అది బూడిదలో పోసిన పన్నీరే అయిపోయింది. దానికి కారణం వీటీవీ గణేశ్‌.

Vtv Ganesh

ఆయన లేటెస్ట్ సినిమా ‘సంక్రాంతికి వస్తున్నాం’. వెంకటేశ్‌ – ఐశ్వర్య రాజేశ్‌ – మీనాక్షి చౌదరి – అనిల్‌ రావిపూడి కాంబినేషన్‌లో తెరకెక్కిన ఆ సినిమా ప్రీరిలీజ్‌ ఈవెంట్‌ లాంటి మ్యూజికల్‌ నైట్‌ను నిర్వహించారు. ఈ కార్యక్రమంలో వీటీవీ గణేశ్‌ మాట్లాడుతూ ‘భగవంత్‌ కేసరి’ సినిమా ప్రస్తావన తీసుకొచ్చారు. అనిల్‌ సినిమా కాబట్టి దాని గురించి మాట్లాడుతున్నారేమో అని అనుకున్నారంతా.

ఇంతలో ఆ సినిమాను విజయ్‌ ఐదుసార్లు చూశారు అనే మాట చెప్పుకొచ్చారు. అంతేకాదు ఆ సినిమా అనిల్ రావిపూడిని పిలిపించి రీమేక్ చేయమని కోరితే సున్నితంగా తిరస్కరించి వచ్చారని చెప్పుకొచ్చారు. అంతగా నచ్చేలా అనిల్‌ ఆ సినిమా చేశారని వీటీవీ గణేశ్‌ చెప్పారు. దీంతో విజయ్‌ చేస్తున్న నెక్స్ట్‌ సినిమా అదే అంటూ చర్చ మొదలైంది.

అయితే అనిల్‌ రావిపూడి ఎంతగా వీటీవీ గణేశ్‌ సర్దిచెప్పి టాపిక్ డైవర్ట్ చేద్దామని చూసినా గణేష్ వినలేదు. అనుకున్నది చెప్పేశారు. ఇప్పుడు ఈ వీడియో మొత్తంగా వైరల్‌గా మారింది. అయితే అనిల్ రావిపూడి ఆ తర్వాత క్లారిటీ ఇస్తూ విజయ్‌ను కలిసిన మాట వాస్తవమే కానీ అది వేరే విషయం గురించని ఏదో చెప్పబోయారు. ఆ సినిమా గురించి ఆ టీమ్‌ అనౌన్స్‌ చేస్తేనే బెటర్‌ అనేలా చెప్పారు.

ఈ నేపథ్యంలో విజయ్‌ సినిమా గురించి అర్జెంట్‌గా క్లారిటీ ఇవ్వాల్సిన అవసరం నిర్మాణ సంస్థకు వచ్చింది. మరి క్లారిటీ ఇస్తారో లేక వదిలేస్తారో చూడాలి. ఇప్పటికైతే ఓసారి దర్శకుడు హెచ్‌.వినోద్‌ రీమేక్‌ కాదు అనే క్లారిటీ లాంటిది ఒకటి ఇచ్చారు.

వెంకీ ఆసనం చూశారు.. ఇప్పుడు సూత్రాలు చెప్పాడు.. పాటిస్తారా?