మనల్ని కడుపుబ్బా నవ్వించే హాస్య నటుల జీవితాలు విషాదాలమయంగా ఉంటాయని ఎవ్వరూ ఊహించలేం. అనారోగ్యం, కుటుంబ సమస్యలు, ఆర్థిక ఇబ్బందులు ఎన్ని ఉన్నా కెమెరా ముందు తమ సహజ నటనతో ప్రేక్షకులను అలరిస్తున్నారు. దేశంలో చాలామంది హాస్యనటుల జీవితాలు కష్టాలతో మొదలై, చివరికి కష్టాలతోనే ముగిసిపోతున్నాయి. టాలీవుడ్ టూ బాలీవుడ్ ఇలాంటి వారెందరో. కానీ కొందరు మాత్రమే టాప్ రేంజ్కి చేరుకోగలిగారు. ఈ లిస్ట్లో ముందు వరుసలో కనిపించే పేరు జానీ లివర్.అమాయకమైన ఫేస్, వెరైటీ మేనరిజంతో దాదాపు మూడున్నర దశాబ్దాలుగా ప్రేక్షకులను నవ్విస్తున్నారు జానీ లివర్.
హిందీ ఇండస్ట్రీలో ఎంతమంది కమెడియన్లు ఉన్నా జానీ లివర్ స్థాయి వేరు. ఆయన డేట్స్ కోసం స్టార్స్ సైతం వెయిట్ చేస్తారంటే అతిశయోక్తి కాదు. అంతా జానీ లివర్ను ఉత్తరాదికి చెందిన వ్యక్తే అనుకుంటారు. కానీ ఆయన అచ్చ తెలుగు వ్యక్తి. ప్రకాశం జిల్లాలోని కనిగిరిలో జానీ లివర్ (Johnny Lever) పుట్టారు. ఆయన పూర్తి పేరు జాన్ ప్రకాష్ రావు జనుముల. ఆయన తండ్రి హిందుస్తాన్ యునిలివర్లో పనిచేస్తుండటంతో వీరి కుటుంబం ముంబైలో స్థిరపడింది.
ఆర్థిక ఇబ్బందుల కారణంగా 7వ తరగతి వరకే చదువుకున్న జానీ లివర్ అనంతరం కుటుంబ బాధ్యత తీసుకున్నారు. ఇందుకోసం చిన్నా చితకా పనులు చేసిన ఆయన ఒకానొక టైములో పెన్నులు అమ్మి కుటుంబాన్ని పోషించారు. ఈ క్రమంలో హిందుస్తాన్ యునిలివర్ కంపెనీ నిర్వహించిన ఓ ఈవెంట్లో పలువురిని అనుకరిస్తూ జానీ లివర్ చేసిన మిమిక్రీ ఆ కంపెనీ ఉన్నతాధికారులను ఆకట్టుకుంది. ఆ సమయంలో సిబ్బంది అంతా ఆయనను జానీ లివర్ అని ముద్దుగా పిలిచి ప్రశంసించారు.
సినీ పరిశ్రమలోకి అడుగుపెట్టిన తర్వాత ఆ పేరునే తన స్క్రీన్ నేమ్గా మార్చుకున్నారు జానీ.ఈ ఘటనతో స్టాండప్ కమెడియన్గా మారిన జానీ లివర్ తన ప్రతిభతో బాలీవుడ్లో వరుస అవకాశాలు అందుకుని స్టార్ కమెడియన్గా ఎదిగారు. 70 ఏళ్ల వయసులోనూ అదే ఎనర్జీతో నటిస్తూ ఎంతో మందికి ఆదర్శంగా నిలిచారు. ఒకప్పుడు ఆర్థిక ఇబ్బందులతో పెన్నులు అమ్మిన జానీ లివర్ ఇప్పుడు భారతదేశంలోని సంపన్న నటుల్లో ఒకరు అనడంలో అతిశయోక్తి లేదు. ఆయన ఆస్తుల విలువ రూ.250 కోట్ల పైమాటే. కృషి, పట్టుదల, శ్రమ ఉంటే ఎవరైనా అసాధారణ స్థాయికి చేరుకోవచ్చని జానీ లివర్ (Johnny Lever) జీవితం నిరూపించింది.
