Sankranthiki Vasthunam OTT: సంక్రాంతికి వస్తున్నాం.. OTT కంటే ముందే ఓ సర్ ప్రైజ్!

ఒకప్పుడు టెలివిజన్ ఛానళ్లలో కొత్త సినిమాల ప్రీమియర్లకు విపరీతమైన ఆదరణ ఉండేది. కుటుంబమంతా కలిసి సినిమా చూడడాన్ని ప్రత్యేక అనుభూతిగా భావించేవారు. టిఆర్పి రేటింగ్స్ ద్వారా ఛానల్స్‌కు, హక్కుల రూపంలో నిర్మాతలకు గణనీయమైన ఆదాయం వచ్చేది. కానీ ఓటీటీ రాకతో ఈ ట్రెండ్ పూర్తిగా మారిపోయింది. ఇప్పుడు చాలా సినిమాలు టీవీ ప్రసారం కన్నా ముందే ఓటీటీలో విడుదలవుతున్నాయి. ఈ పరిస్థితిని ‘సంక్రాంతికి వస్తున్నాం’ (Sankranthiki Vasthunam) సినిమా మళ్లీ మార్చేలా ఉంది.

Sankranthiki Vasthunam OTT:

ఈ సినిమా శాటిలైట్, ఓటీటీ హక్కులను జీ సంస్థ సొంతం చేసుకుంది. కానీ ఆశ్చర్యకరంగా ముందుగా జీ తెలుగు ఛానల్‌లో ప్రీమియర్ చేసి, ఆ తర్వాత జీ5 లో స్ట్రీమింగ్ చేయనున్నారు. ఇది చాలా సంవత్సరాల తర్వాత ఓటీటీ కంటే ముందు టెలివిజన్ ప్రీమియర్ ఇస్తున్న భారీ సినిమా. 300 కోట్లకు పైగా గ్రాస్ సాధించిన ఈ మూవీ బుల్లితెరపై వస్తుందనే వార్త ప్రేక్షకుల్లో ఆసక్తిని పెంచుతోంది. థియేటర్లలో భారీ హిట్ సాధించిన సినిమా టీవీలో ప్రసారం అవుతుందంటే ప్రేక్షకులు ఊరికే వదులుకుంటారా?

కుటుంబమంతా కలిసి చూసేలా ఈ ప్రీమియర్ ఒక ఫెస్టివల్‌గా మారే అవకాశముంది. సంక్రాంతికి వస్తున్నాం థియేటర్లలో ఇప్పటికీ డీసెంట్ హోల్డ్‌తో కొనసాగుతుండటంతో, దాని స్మార్ట్ ప్రీమియర్ డేట్‌పై అందరిలో ఆసక్తి నెలకొంది. ఫిబ్రవరి మూడో వారం లేదా మహాశివరాత్రి సందర్భంగా ప్రసారం చేసే అవకాశముంది. అయితే, ఈ ప్రయోగం మిగిలిన సినిమాలకూ వర్తిస్తుందా? అన్నది మాత్రం సందేహమే.

అమెజాన్ ప్రైమ్, నెట్‌ఫ్లిక్స్‌లాంటి డిజిటల్ కంపెనీలకు తమ స్వంత టెలికాస్ట్ ఛానల్స్ లేవు. కాబట్టి ఈ విధానం అన్ని సినిమాలకు సాధ్యమయ్యే అవకాశాలు తక్కువే. కానీ జీ సంస్థ ఈ మోడల్‌ను సక్సెస్ చేస్తే, టీవీ ఛానల్స్ మళ్లీ శాటిలైట్ హక్కులపై దృష్టి పెట్టేలా అవుతాయి. మరి ‘సంక్రాంతికి వస్తున్నాం’ ఏ మేరకు విజయవంతం అవుతుందో చూడాలి.

ఇక కన్ఫ్యూజన్ తీరేది ఆ రోజే..!